𝐀𝐒𝐒𝐀𝐌 𝐏𝐀𝐓𝐑𝐈𝐊𝐀 &𝐍𝐄⁷বাৰঘৰীয়া বাৰগোপাল থানত ভোগালী মহোৎসৱ উদযাপনৰ ব্যাপক প্ৰস্তুতি
অসম পত্ৰিকা বিশেষ: পূৱ নলবাৰী, ১২ জানুৱাৰী
বৃহত্তৰ পূৱ নলবাৰী অঞ্চলৰ বাৰঘৰীয়া বাৰগোপাল থানৰ ১২৬ সংখ্যক ভোগালী মহোৎসৱখনি অহা ১৪, ১৫ আৰু ১৬ জানুৱাৰীত তিনিদিনীয়াকৈ পালন কৰাৰ প্ৰস্ততি চলাইছে। জনশ্ৰুতি অনুসৰি এই থানখনত ভক্তই সেৱা ললে নিজৰ মনৰ কামনা পূৰণ হয়। সম্প্ৰতি থানখন সমগ্ৰ অসমতে এক চৰ্চাৰ বিষয় হৈ পৰাত থানখনৰ মহোৎসৱলৈ ৰাজ্যৰ ভিন্ন প্ৰান্তৰ লোকে আহি ভিৰ কৰেহি। মহোৎসৱৰ কেইদিন ভক্তপ্ৰাণ ৰাইজে থানখনত ভিৰ কৰাৰ বাবে বিৰ দি বাট নোপোৱা এক পৰিবেশৰ সৃষ্টি হয়। দোকান-পোহাৰ আদি চাৰিওফালে মানুহৰ ভিৰে ঠাইখিনিক মহোৎসৱৰ কেইদিন এক পৰ্যটনস্থলীলৈ পৰিণত কৰে। এইবেলিও উদযাপন সমিতিয়ে তিনিওটাদিনতে বিভিন্ন অনুষ্ঠান অনুষ্ঠিত কৰাৰ কথা প্ৰকাশ কৰিছে। প্ৰথম দিনা মূখ্যদ্বাৰ মুকলি তথা মহোৎসৱৰ শুভাৰম্ভ কৰাৰ পিছত বন্তি প্ৰজ্বলন, মেজি প্ৰজ্বলন, পতাকা উত্তোলন, স্মৃতি তৰ্পন আৰু মাল্যাৰ্পণ কৰা হ’ব। ইয়াৰ পিছত ভোগালী মহোৎসৱৰ আনুষ্ঠানিক সভা উদ্বোধন কৰা হ’ব। পিছত অসমৰ বহুকেইজন শিল্পীৰ স্মৃতিত শ্ৰদ্ধাঞ্জলি অনুষ্ঠান অনুষ্ঠিত কৰা হ’ব। ইয়াৰ পিছত শিৱ মন্দিৰৰ বন্তি প্ৰজ্বলন, আতচবাজি শুভ উদ্ধোধন কৰা হ’ব। পিছত স্থায়ী মঞ্চ উদ্ধোধন, থিয়নাম প্ৰদৰ্শন, নাগাৰা নাম পৰিবেশন কৰা হ’ব। সন্ধিয়াৰ ভাগত বিভিন্ন অনুষ্ঠানৰ লগতে পিছৰ দুটা দিনত বিভিন্ন অনুষ্ঠান অনুষ্ঠিত কৰা হ’ব।
